ភ្នំពេញ៖ រដ្ឋបាលរាជធានីភ្នំពេញនឹងរៀបចំទីតាំងចំនួន៣ សម្រាប់បញ្ចាំងស្លាយ LED ផ្សាយបន្តផ្ទាល់ នៃពិធីបើកព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ នាល្ងាចថ្ងៃទី០៣ ខែមិថុនា ឆ្នាំ២០២៣ និងពិធីបិទនៅថ្ងៃទី០៩ ខែមិថុនា ឆ្នាំ០២៣ ចេញពីពហុកីឡដ្ឋានជាតិមរតកតេជោ។

ទីតាំងទាំង៣នោះ គឺនៅសួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ ទី២ នៅសួនច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ និងទីតាំងទី៣ គឺនៅទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ។

ពិធីបើកព្រឹត្តិការណ៍ប្រកួតកីឡាអាស៊ានប៉ារ៉ាហ្គេមលើកទី១២ នឹងមានការផ្សាយបន្តផ្ទាល់ចាប់ពីល្ងាចម៉ោង៦ រហូតដល់ចប់កម្មវិធី។ រដ្ឋបាលរាជធានីភ្នំពេញអំពាវនាវប្រជាពលរដ្ឋទាំងអស់ក្នុងរាជធានីភ្នំពេញអញ្ជើញចូលរួមគាំទ្រទស្សនាការផ្សាយបន្តផ្ទាល់នេះឱ្យបានច្រើនកុះករ និងអធិកអធម។

នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានបញ្ជាក់ថា ពិធីបើកព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ដែលនឹងធ្វើឡើងនៅថ្ងៃទី០៣ ខែមិថុនា ឆ្នាំ២០២៣ មិនចាញ់ពិធីបើកព្រឹត្តិការណ៍កីឡាស៊ីហ្គេមឡើយ ពោលនឹងមានការបាញ់កំាជ្រួចអបអរសាទរច្រើនជាងស៊ីហ្គេម។

សម្តេចតេជោ បានជំរុញឱ្យពលរដ្ឋគាំទ្រ និងលើកទឹកចិត្តដល់អត្តពលិកជនមានពិការភាពកម្ពុជា និងអត្តពលិកជនមានពិការភាពនៅបណ្តាប្រទេសដែលចូលរួមប្រកួតកីឡាអាស៊ានប៉ារ៉ាហ្គេមលើកទី១២ ផងដែរ៕